E desdaquí adelante damos a uos amos e cada uno de uos por quitos pora siempre del omenage que a nos fiziestes de los castiellos sobredichos del Algarue e de todos los pleitos e de todas las posturas sobredichas, que desdaquí adelante nunqua a nos nin a otro por nos seades tenudos de responder de todas estas cosas sobredichas nin de ninguna dellas. E dezimos e otorgamos e damos por derecho que uos amos e cada uno de uos, dando e entregando los castiellos sobredichos del Algarue al sobredicho rey don Alfonso de Portugal e a don Denís o al otro su fijo o fija desse rey de Portugal, así como sobredicho es, que uos fazedes derecho en los dar e gelos entregar, e ese rey de Portugal o su fijo o fija fazen derecho en los recebir, assí como sobredicho es, e uos e cada uno de uos fazedes todo uestro derecho dessos castiellos e sodes quitos del omenage que a nos fiziestes dessos castiellos. E si por auentura desdaquí adelante alguna carta o cartas apareciesse o apareciesen sobrestos castiellos sobredichos o sobre omenage que uos dellos fiziéssedes e sobre pleitos o posturas que fuesen fechas a nos o puestas sobre fecho del Algarue, non ualan y sean cassadas e non ayan ninguna firmedumbre, e esta carta sea firme e estable para siempre. E porque todo esto sea firme e estable e nunqua pueda venir en dubda, damos endea uos esta nuestra carta abierta seellada de nuestro seello de plomo que tengades en testimonio. Fecha la carta en Badajoz, por nuestro mandado, miércoles diez e sex días andados del mes de febrero, en era de mil e trezientos e cinco annos. Millán Pérez la fizo escruir”.

(19 de Abril de 2019)